面試考的東西

今朝早有朋友send比我,問我當年比人問左咩問題。利申先,成十年前既事,而家校長又轉左,我唔擔保以下資料準確性~

我印象中當年入學試無科普呢關,反而最印象深刻係要用普通話答最鍾意既卡通人物(我答左多啦A夢)。而英文要睇一段無字幕既黑白影片,之後要二對一咁答返有關影片既問題。從來都唔睇英文電視劇,小學時一本完整英文paperback novel都無讀過既我緊係完全睇唔明,我覺得係咩就自己亂作。英文第二部分係cloze passage,正正就係一篇總結影片內容既文章,我果時先知原來我答錯哂。

由幾年前大家熱議「蝦煮熟點解係紅色」開始,我已經周圍同人講,大家好似都捉錯重點。答案識唔識(我覺得)唔係最重要,當年問返入到黎既同學,都無咩邊個睇得明套影片。重要係遇到困難要點嘗試解決、就算真係唔識可以點解釋自己既思路、知道自己答錯可以點保持冷靜不被影響。

到中三做過一年面試helper,最印象深刻係有學生睇完英文影片之後因為唔識,所以係課室入面即場喊出黎,要老師同我地安慰、幫佢平伏情緒。呢啲係咪參加多幾個面試班就可以避免到既情況呢?應該就需要靠更長期咁培養逆境自處既能力喇,問題究竟實際問啲咩,唔一定係最重要既。

果年做helper就係新增左「科普」環節,聽負責既同學話,有條題目係「介紹對講機的運作原理」。各位讀者,你認為一個小六學生,點樣先可以答到呢條問題呢?